ညီညီထွေး
အောက်တိုဘာ ၁၂ ရက်၊ ၂ဝဝ၇ ခုနှစ်
နအဖ စစ်သွေးကြွ အုပ်စုရဲ့ အဆုံးမဲ့ ရက်စက်ယုတ်မာ လူမဆန်မှုများအား မျက်ဝါးထင်ထင် တွေ့ မြင်လိုက်ရတဲ့ ယဉ်ကျေးမှု လူ့ကမ္ဘာ့ရွာကြီးဟာ မယုံကြည်နိုင်ခြင်း များစွာနဲ့  ထိတ်လန့်တကြား ဖြစ်ခဲ့ရပါတယ်။ ယဉ်ကျေးမှု အထွန်းကားဆုံး အချိန်၊ လူ့အခွင့်အရေးများကို အသိအမှတ်ပြု အခံရဆုံး နှစ်ဆယ့်တရာစု ကာလနဲ့  လူသားမျိုးနွယ် လောကရဲ့  အသိဉာဏ် အမြင့်ဆုံး ခောတ်ကို လက်တဆုပ်စာသော နအဖ စစ်ဝါဒီများက သူတို့ရဲ့ အသိဉာဏ်မဲ့ မိစ္ဆာ လုပ်ရပ်များကို ဖွင့်ချပြသပြီး ခြိမ်းခြောက် စိန်ခေါ်ပြက်ရယ်ပြု လိုက်ပါတော့တယ်။ ဒါဟာ ပညာလူ့အဖွဲ့အစည်းများဆီ လှမ်းချီနေကြတဲ့ ကမ္ဘာ့လူ့ဘောင်ကို အမိုက်မဲဆုံးသော နအဖ ဗိုလ်ချူပ်များက အကြမ်းဖက် ဝင်ရောက် တိုက်ခိုက်လိုက်ခြင်းလည်း ဖြစ်ပါတယ်။
ငြိမ်းချမ်းရေးနဲ့ မေတ္တာတရားတို့ရဲ့ အနှစ်သာရတို့  စုဝေး ကိန်းအောင်းရာ သာသနာ့ နယ်မြေများကို ထင်သလို ဝင်ရောက် ဖျက်ဆီးနေပြီး သွေးရောင် ဖုံးလွှမ်း စွန်းထင်းစေခြင်းဟာ တိရစ္ဆာန်များထက် အောက်တန်းကျတဲ့ လူဒိဋ္ဌိတို့ရဲ့ ဆင်ခြင်တုံတရား ကင်းမဲ့တဲ့ လုပ်ရပ်များသာ ဖြစ်ပါတယ်။ နှစ်ပေါင်း ထောင်ချီ ထွန်းကားလာခဲ့တဲ့ ဗုဒ္ဓဘာသာကို နအဖ စစ်သွေးကြွများက လုံးဝ ပျက်သုန်းသွားအောင် ထိုးစစ်ဆင်နေခြင်းလည်း ဖြစ်ပါတယ်။
ရာစုတဝက် နီးပါးခန့်  လူစိတ်ကင်းမဲ့တဲ့ စစ်ဝါဒီတို့ရဲ့ တရားလက်လွတ် ထင်ရာစိုင်း သွေးစုပ်ဖိနှိပ် အုပ်ချူပ်မှု အောက်မှာ တိုင်းပြည်လည်းကြေ လူထုလည်း သေလုမြောပါး ဖြစ်နေခဲ့ကြရတာ ကြာခဲ့ပါပြီ။ အခုတော့ မြန်မာပြည်က လူတဦးချင်းစီရဲ့  အသက်ရှင် ရပ်တည်မှုနဲ့ လူထု ကိုးကွယ် တန်ဖိုးထားတဲ့ ဗုဒ္ဓဘာသာတောင် ပျောက်လုနီးနီး ရိုက်ဖြိုခြေဖျက် ခြိမ်းခြောက်ခံ ဘဝများဆီ ဆိုက်ရောက်လာခဲ့ရပါပြီ။
အခုလို နိုင်ငံတခု လူ့ အဖွဲ့အစည်းတခုနဲ့  လူတို့ရဲ့ အသက်အိုးအိမ် စည်းစိမ် အနာဂတ်များအတွက် အလွန် အရေးကြီးတဲ့ အချိန်ကာလမျိုးမှာ ကျနော်တို့ ရှေ့ ဆက်ပြီး ဘာလုပ်ကြမလဲ၊ ကမ္ဘာ့ရွာ အသိုင်းအဝိုင်းကရော ဘယ်အတိုင်းအတာအထိ ကူညီနိုင်မလဲ၊ ဒါ့အပြင် နအဖ စစ်အုပ်စုကရော တိုင်းပြည်နဲ့ လူ့အဖွဲ့အစည်းကို အလုံးစုံ ပျက်သုန်းသွားအောင် ဘယ်အထိ လုပ်ဆောင် နေနိုင်မလဲ စတဲ့ မေးခွန်းတွေက ကျနော်တို့ရဲ့ ဦးနှောဏ်ထဲကို ဖိတ်ခေါ်စရာ မလိုပဲ တိုးဝင်တိုက်ခတ် မေးမြန်းနေမှာ သေချာနေပါတယ်။
ကယ်သူမဲ့နေတဲ့ လူထုရှေ့က မားမားမတ်မတ် ရပ်ပြီး အသက်ကို ပဓါန မထားပဲ မြင့်မြတ်ငြိမ်းချမ်းသော ဓမ္မတိုက်ပွဲကို ဖော်ဆောင် ဆင်နွဲခဲ့ကြတဲ့ အာဇာနည် သူရဲကောင်း ဘုရားသားတော် ရဟန်း သံဃာများက သွေးအသက်နဲ့ ရင်းပြီး လမ်းကြောင်းခင်း ချပေးခဲ့တဲ့ ရွှေဝါရောင် တော်လှန်ရေးကြီးကို မွန်မြတ်သော စိတ်ဓါတ်များနဲ့  ရဲရင့်စွာ လက်ဆင့်ကမ်း ယူပြီး ပြန်လည် သယ်ဆောင် ချီတက်ခြင်းကသာ တိုင်းပြည်နဲ့  လူဘောင်ကို အနာဂတ်သစ် တခုဆီ အရောက် ပို့ပေးနိုင်မှာပါ။
နောက်ပြီးတော့ ဒီနေ့ ကာလမှာ သွေးစစ်တဲ့ အမျိုးသား ရင်ကြားစေ့ရေးကို တိတိကျကျ အဓိပ္ပါယ် ဖွင့်ဆိုရရင်တော့ သန်းပေါင်း ငါးဆယ်ကျော်သော မြန်မာလူထု၏ သွေးစည်း ညီညွတ်မှု၊ အမျိုးဘာသာ သာသနာနဲ့  ပြည်ဖျက်မိစ္ဆာ အရိုင်းအစိုင်း လူသတ် စစ်ဝါဒီ နအဖ အုပ်စုကို အပြီးတိုင် အမြစ်ပြတ် ဖြုတ်ချရေးနဲ့  အကြောက်တရား ကင်းပြီး လူ့အခွင့်အရေး ပြည့်ဝတဲ့ ဒီမိုကရက်တစ် ငြိမ်းချမ်းသော လူဘောင်ကို ထူထောင်ရေးတို့ပဲ ဖြစ်တယ်လို့  ပြောရမှာပါ။ ဘယ်အမျိုးသား တရပ်ကိုမှ ကိုယ်စားမပြုတဲ့ လက်တဆုပ်စာ နအဖ စစ်အုပ်စုနဲ့ တွေ့ဆုံ ဆွေးနွေးခြင်းက အမျိုးသား ရင်ကြားစေ့ရေးဆီ ဦးတည်ပြီး မသွားနိုင်သလို တိုင်းပြည်နဲ့ လူ့အဖွဲ့အစည်းအတွက် တစုံတရာသော ရလဒ်ကောင်းလည်း ထွက်ပေါ်လာလိမ့်မယ်လို့  မထင်မိတာ အမှန်ပါ။
လူထုခေါင်းဆောင် ဒေါ်အောင်ဆန်း စုကြည်ကို တရားခံရှာ တံဆိပ်ကပ်ထားတဲ့ ကြိုတင် သတ်မှတ်ထားသော စည်းကမ်းချက်တွေနဲ့  တွေ့ဆုံ ဆွေးနွေးမယ်လို့ အသံကောင်း ဟစ်နေပြီး တဘက်မှာ အပြစ်မရှိ အပြစ်ရှာ လူဖမ်းပွဲများ ပြုလုပ်ကာ စစ်ကြောရေး စခန်းတွေမှာ နှိပ်စက် သတ်ဖြတ်နေခြင်းဟာ စစ်အုပ်စုရဲ့  ကလိမ်ကကျစ်ဉာဏ်နဲ့  မင်းသား ခေါင်းဆောင်းထားတဲ့ ဘီလူး မျက်နှာကို ထုတ်ဖော် ပြသနေခြင်း ပါပဲ။ လူမှုစီးပွါးရေးနဲ့ နိုင်ငံရေး ပြဿနာကို အဖြေရှာနိုင်ဖို့ တိုင်းပြည်နဲ့ လူမျိုးအတွက် စက� န့်နဲ့အမျှ အလွန် အရေးကြီးနေတဲ့ အချိန်မှာ တိကျ မှန်ကန်တဲ့ လုပ်ငန်းစဉ်နဲ့  အချိန်ကာလ သတ်မှတ်ချက်တွေ တွေ့ဆုံ ဆွေးနွေးရေး ကမ်းလှမ်းချက်ထဲမှာ မပါခြင်းဟာလည်း စစ်အုပ်စုက အပျော့ဆွဲ အချိန်ဖြုန်းခြင်း ပရိယာယ်ကို ကျင့်သုံးနေကြောင်း ပေါ်လွင်နေပါတယ်။
နိုင်ငံရေးဟာ တိုင်းပြည် တည်ဆောက်ခြင်း အနုပညာတရပ် ဖြစ်ပြီး ဒီ အနုပညာပင်ပျို ရှင်သန် ကြီးထွားလာစေဖို့ အမှားနဲ့ အမှန်ကို ခွဲခြား လက်ခံနိုင်တဲ့ တိုင်းပြည်ရဲ့ သြတ္တပ္ပတရားနဲ့ လူထုရဲ့ ရွေးချယ် ဆုံးဖြတ်မှုကသာ မှန်ကန်စွာ စင်ခံ ပေးနိုင်ပါလိမ့်မယ်။ မတရားမှုကို လုံးဝ လက်မခံတဲ့ လူမှု ကျင့်ဝတ် နီတိ တရားများက တရား မျှတမှုနဲ့ လူ့အဖွဲ့အစည်း ရေရှည် တည်တံ့ရေး အတွက် အခြေခံ အုတ်မြစ်ပါပဲ။ စစ်အုပ်စုကတော့ သေနတ်ကိုင်ပြီး လူသတ်ခြင်း ပညာနဲ့ ယဉ်ပါးနေပြီမို့  နူးညံ့သိမ်မွေ့တဲ့ နိုင်ငံရေး အနုပညာနဲ့  လုံးဝ မအပ်စပ်ပါ။ ပြောင်းလဲလာနိုးနိုးကို စောင့်မျှော်ရင်း အပျက်ပျက်နဲ့ နှာခေါင်း သွေးထွက်ပြီး အဆုံးမှာ လူထုရဲ့ ဆင်းရဲမွဲတေ ငတ်မွတ်ခြင်းကသာ အဖတ်တင် ကျန်ရစ်မယ့် စစ်အုပ်စုရဲ့  နိုင်ငံရေး ပုံပြင်ကို နားထောင်ဖို့  အချိန် မဟုတ်တော့ဘူးလို့  လူတိုင်း ခိုင်ခိုင်မာမာ နားလည် ယုံကြည်ထားကြမယ် ဆိုတာကတော့ သံသယ ဖြစ်စရာ မလိုပါ။ အခုလိုကာလမှာ လူထုနဲ့  တသားတည်း ဖြစ်နေသင့်တဲ့ အတိုက်အခံ နိုင်ငံရေး သမားများ အနေနဲ့လည်း နိုင်ငံရေး မာနကို ခဝါမချပဲ ရှင်းလင်း ပြတ်သားတဲ့ တော်လှန်ရေး အမြင်နဲ့  ခေတ်စနစ် ပြောင်းလဲရေးဆီ ဦးဆောင်သွားခြင်းက တိုင်းပြည်အတွက် အကောင်းဆုံး ထွက်ပေါက်ရှာခြင်းလို့  ထင်မြင် မိပါတယ်။
တိုင်းပြည် တပြည်ရဲ့ လွတ်လပ်ရေးဟာ အဲဒီ တိုင်းပြည်က လူထုရဲ့ လက်ထဲမှာသာ ရှိပါတယ်။ တိုင်းပြည်ရဲ့ အနာဂတ် အကောင်းအဆိုးဟာလည်း လူထုရဲ့ ဖန်တီး တည်ဆောက်မှု အပေါ်မှာ လုံးဝ မှီတည်နေပြီး အခွင့်အာဏာ အားလုံးကိုလည်း လူထုလက်သို့  အပ်နှံ ရပါလိမ့်မယ်။ လွတ်လပ်ရေးနဲ့  အနာဂတ် ရှာပုံတော် ဖွင့်ခဲ့ကြခြင်း ဖြစ်စဉ်များနဲ့ ကမ္ဘာ့လူ့သမိုင်းမှာ ဖြစ်ပေါ်ခဲ့တဲ့ တော်လှန်ရေးတိုင်းဟာ နောက်ပြန် မဆုတ်တတ်ပါ။ လူထုရဲ့ ပါဝင်ဆင်နွဲမှု အင်အား အနည်းအများအပေါ် မူတည်ပြီး အချိန်ကာလ အပိုင်းအခြား အနည်းငယ်လောက်သာ ငြိမ်သက် နေသယောင် ရှိတတ်ပေမယ့် တော်လှန်ရေးလှိုင်းက ဟောင်းနွမ်း ဆွေးမြေ့ခြင်းများကို အပြီးတိုင် တိုက်ဖျက်ပြီး စစ်မှန်တဲ့ အသစ်ရှိရာဆီ တလိမ့်လိမ့် လှမ်းချီသွားစမြဲပါ။
No comments:
Post a Comment